صورة

حاولت افتح قلبى للحياة و ابتســـم 

طاوعنى قلبى و حاول يترســـم

شاف ورود و عصافير كتيــر

و افتكر ان الحيـــاة رجعتله تانى

واول ما حس بحنين  اتقســـم !!

كل شئ كان عادى

كل شئ كان عادي
والمقابلة كانت عادية
عدى الوقت
واكتشفت
ان كل اللي فات هيبقى
لحظات تاريخية”
― وليد طاهر

سلمــى 1

معظمنا لما بيقع فى مشاكل بيحاول يحلها او بيدور على حد يساعده انه يحلها

لكن حد كان مستمتع بالمشكلة و بيفرح كل ما تزيد و تتلعبك و كل اما المدة تطول عليها

ماتستغربوش بس انا كده

انا فى مشكلة و مشكلة بحبها بالعكس انا مش عايزها تتحل و بفرح اووى لما تتلعبك

هتقولوا يبقى كده دى مش مشكلة و لاحاجة

موافقة بس لو طبقنا معايير الصح و الغلط و الحقيقة و الكذب يبقى مشكلة

انما لو مشينا ورا قلبى يبقى انا فى اسعد لحظاتى :)

اكيـــد عرفتوا انا اقصد ايه

حقيقى صدق الامام ابن القيم لما قال " من احب غير الله عذب به "

اعرفكوا بنقسى شووية انا سلمى خريجة هندسة  شغالة فى وظيفة مش بطالة و عايشة فى مدينة ست اكتوبر

بالنسبة بقى للحالة الاجتماعية فالموضة الايام دى سينجل و افتخر ده قدامكم بس يعنى :d

فى الشغل انا مهندسة بريمو فى البيت اكذب لو قلت طباخة بريمو < مفيش عمار بينى و بين المطبخ للاسف >

طاايب و سوال اللى بيدور فى ذهنكم انا ليه سينجل لحد دلوقتى

هاريحكم السبب هو انا شبيهه بفتيات العصر الرومانى اللى لما بيحبوا بجد بيخلصوا بجد و بيموتوا فى نهاية الفيلم قبل اما البطل حتى يعرف انها كانت بتحبه

بس انا مش عايزة امووت دلوقتى يعنى بعد الشر عليه:D

طاايب و مين بقى الامير الرومانى

سامح ابراهيم البشمهندس سامح ابراهيم

وده زى ما فاطمة صاحبتى بتقول ليه وصفين وصف عام لو سالتى اى حد غير سلمى هيوصفه ازاى ووصف خاص و ده وصف سلمى

الوصف العام : راجل ايووه راجل امال يعنى ابو قردان طويل الجثة عريض المنكبين شعره اسمر و عنيه كده عسلى على خفيف و وشه مقبول يعنى من الاخر يجى منه

اما من وجهه نظرى فهو فــــارس ضيع جواده عاااااارفين فيلم رشدى اباظة فى الزوجة 13 هو بقى شكل ياسر جلال فى شجيع السيما

كفاية كده بقى انهارده و نكمل بكرة

✿ من البداية ✿

بسم الله الرحمن الرحيم

السلام عليكم و رحمه الله و بركاته

فى البداية احب نقف دقيقة حداد على الاجازة اللى خلصت مننا بسرعة :(

طبعا كل واحد مننا ليه حلم كبير من وهو صغير حلم بحاجات كتير و حقق حاجات كتير و برضة خسر حاجات كتيــر

علشان يوصله لحلمه الكبير ... منا اللى عايز يبقى ظابط  ده زمان طبعا و منا اللى اختار انه يبقى غنى و منا اللى شايفه نفسها ام عظيمة و زوجة مطيعة لزوجها بس طبعا ده بعيد عن سى السيد و امينة مراته

انا كل حلمى فى الحياة انى ابقى دكتورة عظيمة  تخدم البشرية  مش كلام بس لكن الفعل اهم و من صغرى و انا مش متخيلة نفسى غير طالبة فى كلية الطب و ااتعلم العلم صح و اخترع علاج لكل الامراض ..

الحمد لله ربنا انعم عليا بدخول الكلية  و حققت الجزء الاول من الحلم انى بقيت دكتورة و مع اول محاضرة فى الكلية اكتشفت انى علشان احقق الجزء التانى هتعب كتير و الناس هتفتكر مثلا ان طالب الطب او الدكتور مشاكله كلها بتنتهى لما ياخد شهادته و يبقى دكتور

للاسف الوقت ده هو اللى بيبتدى فيه المشاكل و التعب من نواحى كتير دراسته محتاج يكملها و عايز يعمل دكتوراه و ميكملها بمعادله و دبلومة و عايز عيادة و ووظيفة و كل ده لو خلصه يبقى داخل فى 28 سنة و هو اعزب ده لو خلص بسرعة يعنى يبدأ يدور على شريكة حياته اللى هتكمل معاه الرحلة الطويلة

ربنا يعينا على الحياة كل واحد فينا حاسس انه بيحارب فى الدنيا علشان يعيش حياة كريمة ليه و لذريته بعدين

كفاية كده عن حلمى كل واحد يفكر فيكوا هو حلمه ايه يجيب ورقة و قلم و يحسب هو قدر يحققه و لا نساه مع زحمة الحياة

و هل كان فعلا حلمه يستحق انه يتعب علشانه و ايه اللى هيخسره لو حققه او لو فشل فى تحقيقه

يالا سلااام بقى

:)